Mu buzima, hari inkuru zica intege, ariko hari n’izibyutsa icyizere, zigahindura imyumvire, zigatuma wemera ko ejo heza hashoboka. Ubuhamya bwa Ngiruwonsanga Jean Marie Vianney ni bumwe muri zo.

Yinjiye mu gisirikare mu 1985, akorera FAR (Ingabo zatsinzwe) ndetse na RDF nyuma, maze asezererwa mu 2002. Uyu munsi, afite imyaka 60, umugore n’abana 6, kandi ni rwiyemezamirimo ukomeye mu buhinzi n’ubworozi—urugero rugaragaza ko gusezererwa atari iherezo, ahubwo bishobora kuba intangiriro y’urugendo rushya.

Nyuma yo gusezererwa, yanyuze mu ngando i Duha zigamije kumufasha gusubira mu buzima busanzwe. Nta mutungo munini yari afite. Imbarutso ye yose yari 270,000 RWF yahawe na RDRC. Icyakora, icyahinduye ubuzima bwe si amafaranga, ni guhindura imyumvire.

Yatangiye buhoro: ahinga ibirayi n’amatunda, yorora inkoko z’amagi. Uko igihe cyagendaga, yahindutse umunyamwuga: uyu munsi yorora inkoko z’inyama, ingurube zigera kuri 80, inka, kandi ahinga imboga zitandukanye zirimo courgette, karoti n’amashu. Yamenye ko ubuhinzi n’ubworozi bigendana—ifumbire ivuye mu bworozi ikamufasha gufumbira bityo ikabyara umusaruro mwiza mu buhinzi.

Ku murima muto wa ari 3 gusa, courgette ze zitanga umusaruro utangaje: zera mu minsi 50, agasarura inshuro ebyiri mu cyumweru, agakuramo courgette 600 buri cyumweru. Uyu munsi, ibikorwa bye byose bikorerwa ku buso bwa hegitari 10, byose abikesha kwikorera, kwizigamira no gukorana n’ibigo by’imari.

Ntiyagarukiye aho. Yashinze resitora, amacumbi n’akabari, bituma arushaho gutera imbere no gutunga umuryango we. Ubu banki iyishyura agera kuri 1,200,000 RWF buri kwezi, kubera imikorere myiza n’imikoranire ishingiye ku cyizere.

Ubutumwa bwe burumvikana kandi burakangura benshi:

“Abasezererwa bagomba gukoresha ubumenyi bahabwa, umwuga batahana ni wo shingiro ry’ejo hazaza habo. Igihe kirakubaza kiti: ufite iki? Ntutinye guhera kuri bike—n’iyo waba ufite urukwavu rumwe, mu mezi make ushobora kuba ufite nyinshi. Iyemeze, wibumbire hamwe n’abandi mu makoperative no mu bimina byo kuzigama, kandi wiyegereze ibigo by’imari n’amabanki.”

Uyu munsi, Ngiruwonsanga Jean Marie Vianney ni ikimenyetso cy’uko bishoboka: ko umuntu ashobora gusezererwa mu gisirikare agasubizwa mu buzima busanzwe, bityo akaba yagera ku butunzi, ko gusezererwa atari iherezo, ahubwo ari amahirwe yo kwiyubaka no kubaka Igihugu. Ubuhamya bwe ni isomo rikomeye kuri buri wese wemera guhindura imyumvire, gukora, no kwihangana.